無救贖的時代

（上尾更新佇：2018-01-05）

這是一个科技發達、思想當咧興的時代，煞是人人空虛毋過無救贖的時代。

古早社會雖罔無較濟的物質文明，人民的思想嘛予迷信崁牢，但是逐家攏有信仰佮社里厝邊相伨[thīn]，行動攏有𪜶[in]保護甲在在，物質雖然少，毋過嘛袂生湠人的慾望。但是，迷信嘛予人的心無自由。

今[tann]的社會隨著濟濟思想家拍破迷信，閣有真濟思潮的出現，人的頭殼嘛對崁牢的布敨放出來。而且因為濟濟人掠宗教毋是理性的，而且驚限制人的想法抑是衝擊多元的思想，𪜶就無愛接受。

毋過現在的人無定就是自由的。因為現在資本主義唌[siânn]人用財寶換商品這款偶像，滿足人內底的空虛。但是這嘛是無法度共心內扞予定[huānn-hōo-tiānn]，人抑是夯[giâ]痛苦的枷。閣較慘的，是資本主義嘛叫人工課頭時愛獻家己的性命成就資本家的大業，加上科技文化麻痺人的心，控制、監視逐位的行動。咱敢毋是生佇無自由的世界？但是人準若無想欲揣著救贖家己的法度，獨獨啉過量資訊的酒甲茫茫，毋管是2017年、2018年，甚至一百年後，人抑是無得通解放的吧[--pah]。